Лондон, 6 октомври (МИА) - Во светот драстично расте побарувачката на вакцините против грипот А, соопшти денеска британскиот фармацевтски гигант „ГлаксоСмитКлајн“ (ГСК), нагласувајќи дека моментно има нарачка од 440 милиони дози од вакцината против оваа болест.
Последните податоци што ги објави ГСК на 4 август беа дека владите на 22 земји имаат порачано 149 милиони нови дози од вакцината.
Швајцарскиот гигант „Новартис“ пак соопшти дека успеал пред рокот да ја заврши испораката на вакцините против грипот „Флувирина“ во САД. Во САД биле испорачани вкупно 27 милиони дози од таа вакцина.
Швајцарската компанија во денешното соопштение наведе дека од 27 септември во САД почнала да ги испорачува првите дози од вакцина против вирусот H1N1 на грипот A, како и дека го забрзала производството на тој лек.