Лондон, 7 октомври (МИА) - Европската унија има таен план да постане светска сила со овластување да склучува меѓународни договори во име на своите членки, објави денеска Дејли телеграф.
За време на тајните преговори за примена на Лисабонскиот договор изнесени се предлози дека ЕУ треба да склучува договори, па дури и да отвори амбасади ширум светот.
Според доверлив документ, првите пилот „амбасади“ би требало да бидат отворени во Њујорк, Кабул и Адис Абеба. Таа одлука е донесена пред референдумот во Ирска и подразбира формирање нова дипломатија со повеќе од 160 претставници и амбасадори ширум светот.
Според директорот на независниот британски институт Отворена Европа, Лорен Малали тој план подразбира огромен трансфер на власт и поради тоа ЕУ повеќе ќе изгледа како држава отколку како унија на држави заснована на меѓународен договор.
- Тоа значи дека ЕУ, а не членки, за првпат од основањето ќе може да потпишува меѓународни договори - за надворешна политика, одбрана, борба против криминалот и прашања од доменот на судството, изјави таа.
Во доверливиот документ во кој весникот имал увид се додава дека постои потреба да се воведат правни измени и да се формира Европска надворешна служба односно дипломатски и странски сервис со „глобален географски опсег“.
Амбасадорите во вторникот почнале тајно, да работат на основање нови институции - ЕААС, министер за надворешни работи и претседател на ЕУ, кои се предвидени со Лисабонскиот договор. Начелни одлуки ќе бидат донесени иако Чешка и Полска се уште не го ратификувале Лисабонскиот договор, наведува Дејли телеграф.