Лисабон, 22 февруари (МИА) - Според еколози и експерти природната катастрофа, која го зафати португалскиот остров Мадеира за време на викендот при што загинаа најмалку 42 лица, е причинета од моделот на забрзана урбанизација во последните 30 години на островот, што, според нив, било на штета на животната средина и правилата за безбедност.
- Она што се случи на Мадеира е типичен пример до што може да доведе лошо планирана урбанизација, изјави Рикардо Рибеиро, претседател на Португалската асоцијација на техничарите од Цивилната заштита.
Според него, изградбата на станбени објекти во поплавените зони и непропустливоста на почвата, причинета од бетонирањето, особено во јужните реони на островот најзасегнати од поплавите и свлечиштата, делумно го објаснуваат големиот број жртви - 42 загинати и над 120 ранети според неофицијалните податоци.
Во последните 30 години португалскиот остров Мадеира преживеа спектакуларно модернизирање преку политиката на забрзана изградба, финансирана во голем степен од ЕУ.
Според екологот Хелдер Спинола, политиката на масовна изградба на згради, патишта и инфраструктура во близина до водените пространства предизвикала „непропустливост на почвата преку асфалтирање и бетонирање, што се заканило на нормалниот тек на трите главни реки кои минуваат преку Мадеира“.