Киев, 24 февруари (МИА) - Украинскиот премиер Јулија Тимошенко ги предизвика денеска нејзините политички противници во Парламентот да ја соборат од власт, изгласувајќи и недоверба.
Тимошенко ова го изјави еден ден пред Виктор Јанукович да стапи на должноста претседател на Украина, откако со мала предност ја победи премиерката на изборите на 7 февруари.
- Државата има потреба од јасен одговор за тоа кој е одговорен за нејзиното функционирање, за обезбедување на сите форми на развој и ние како тим едноставно сме должни да и го дадеме на земјата тој одговор, рече Тимошенко на седница на Владата.
Партијата на регионите на Јанукович му ја предаде денеска на Парламентот доработената нацрт уредба за изгласување недоверба на Владата на Тимошенко, чие усвојување би довело до оставка на кабинетот. Според авторите на нацртот, политиката на Владата на Тимошенко придонела за заострување на социјално-економските проблеми во општеството.
Заменик-претседателот на партијата на Јанукович, Ана Герман изјави дека тој никогаш нема да може да ја води државата заедно со Тимошенко како премиер и оти ќе се обиде да ја смени до крајот на пролетта.
За да формира коалиција, која ќе има мнозинство, Јанукович мора да се спогоди со неговиот поранешен политички противник, досегашниот претседател Виктор Јушченко.