Москва, 25 февруари (МИА) - Рускиот претседател Дмитриј Медведев изрази во интервју за Пари мач, загриженост поради ситуацијата околу Иран и повика Техеран да се однесува одговорно.
Во интервјуто, чиј текст го објави Кремљ, се вели дека „клуч за излез од таа ситуација е само одговорно однесување на Иран“ и потребно е Техеран да ги усогласи своите нуклеарни програми со барања на меѓународни организации, и од друга страна работите во таа област да бидат транспарентни.
- Со кого и да разговарам, од раководители на држави на Блискиот исток до европски држави, тоа сите ги загрижува, вели тој. - Ако се случи нешто тешко, тоа ќе предизвика хуманитарна катастрофа.
Во интервјуто дадено пред посетата на Франција (1-3 март) вели дека во новата руска доктрина НАТО не е главна воена закана за Русија.
Во врска со економската криза Медведев вели дека таа ги приморала државите глобални актери да разговараат со ист, економски јазик и да се обидат заеднички да дејствуваат.
Тој се заложи за создавање нова финансиска структура.
За Русија вели дека е потребно да се реформира стопанството, да се создадат несуровински извори на раст, да се занимава со висока технологија и „да се формира во суштина, нов дел од руската економија“.
Во врска со односите со поранешниот претседател, а сега премиер Владимир Путин, и за себе во врска со претседателските избори во 2012 година, Медведев вели дека е подготвен да ја разгледа политичката иднина на Русија и нивното место во политичката иднина на државата.
- Засега имаме целосно функционален сојуз кој според мене, обезбедува корист за нашата држава, изјави Медведев. Коментирајќи ја изјавата на Путин дека тие двајца се луѓе со „иста крв“ Медведев вели дека тоа и навистина е така. - Неодамна тоа го разјаснивме тоа во медицинска смисла на зборот, наведува Медведев.