Рим, 25 февруари (МИА) - Еден италијански обвинител побара денеска од Касациониот суд во Рим да се откаже од обвинението против британскиот адвокат Дејвид Милс, осуден за земање поткуп од италијанскиот премиер Силвио Берлускони, поради застарување на случајот.
Судот во текот на денов треба да донесе одлука и за жалбата на адвокатот Милс, кој минатата година е осуден на 4,5 години затвор поради земање поткуп од 600.000 долари за да ги прикрие доказите против Берлускони и неговата компанија „Фининвест“ во два случаја од 1990 година.
Доколку Касациониот суд во Рим го одобри барањето на обвинителот Џанфранко Чани, големи се шансите дека ќе се откаже и од случајот за корупција против Берлускони, кој е поврзан со истиот.
И Берлускони и Милс го отфрлаат обвинувањето за давање, односно земање поткуп.
Судењето на Берлускони кон средината на јануари е одложено до 27 февруари, до кога би требало да заврши жалбената постапка во случајот со адвокатот Милс.