Париз, 7 јуни 2010 (МИА) - Францускиот претседател Никола Саркози кој не е посебно висок наредил да не се ангажираат високи телохранители.
Полициски неименуван извор за францускиот весник „Паризиен“ изјавил дека високите телохранители дискретно биле советувани да не се кандидираат за обезбедување на претседателот, бидејќи нема да бидат ангажирани.
Претседателското обезбедување сега брои околу 80 телохранители, а во 2002 година околу 50 луѓе. Зголемувањето се должи на тоа што во 2002 година маж со психички проблеми успеа да пука од ловечка пушка во претходникот на Саркози, Жак Ширак.
Саркози е посебно чувствителен кон својата висина околу 165 сантиметри со што е понизок и од Наполеон. Тој прави се за да не изгледа низок при своите изјави на меѓународната сцена или кога е заедно со својата сопруга Карла Бруни која носи ниски чевли.
Саркози освен што носи специјални чевли со дебели ѓонови забележан и е дека стои на прсти кога позира на заедничките слики со другите светски лидери, а минатата година при одбележувањето на годишнината од десантот во Нормандија се имаше качено врз кутија за да биде рамо до рамо со американскиот претседател Барак Обама.
Забележан е и случајот кога работниците од француската автомобилска индустрија биле поканети на прием кај Саркози, но претходно биле одбрани посебно ниските по раст. Елисејската палата ваквото тврдење го отфрли како „гротесно и апсурдно“.