Москва, 5 август 2010 (МИА) - Билансот на загинатите во пожарите во Русија се зголеми на 50 лица, а бројот на пожарите се зголеми за 69, соопшти руското Министерство за вонредни ситуации.
Една жртва е пронајдена при расчистување на урнатините од опожарена куќа во Нижњегородската област, а едно лице почина во болница во Вороњешката област.
На територијата на Русија се забележани 843 пожари, а вкупната површина зафатена од огнената стихија изнесува 196 илјади хектари.
Во гаснењето на шумските пожари и запалените полиња со тресет се вклучени околу 162 илјади лица и над 26 илјади возила и летала.
Италија, по наредба на премиерот Силвио Берлускони, испрати два авиони од типот „канадер ЦЛ415“, кој наеднаш можат да испуштат шест тони вода. Од Украина се очекува пристигнување на две противпожарни одреди во Вороњешката област, каде веќе се ангажирани два украински авиони „антонов 32“. Во Нижњегородската област пристигнале два „љушина 76“ од Ерменија, а се очекува во Липецката област да пристигнат и хеликоптери Ми-17 и Ка-32 од Азербејџан. Помош понудиле и Белорусија, Казахстан, Германија, Бугарија и Полска.
Во Москва и натаму се забележани невообичаени жештини, а изутринава главниот руски град повторно е под „завеса од чад“, но нешто поретка од вчера.