Мадрид, 6 септември 2010 (МИА) - Шпанската Влада се воздржа од официјални коментари на соопштението на баскиската ЕТА за „прекин на вооружената борба за слобода и независност на државата на баскијците“.
Според извори од Владата, премиерот Хосе Луис Сапатеро смета дека соопштението е „крајно скептично“ и „двосмислено со цел да внесе недоразбирање“.
На инсертите прикажани на Би-Би-Си, се гледаат тројца маскирани луѓе. Во соопштението се вели дека организацијата го донела тоа решение пред неколку месеци „за да биде дадена можност за демократски процес“.
Не се прецизира дали примирјето е трајно или привремено.
Владини извори за весникот Паис тврдат дека соопштението е „очигледно недоволно“.
Шпанскиот министер за внатрешни работи Алфредо Перес Рубалкаба денеска со група експерти, ќе го разгледа видео-записот и ќе даде оценка за содржината, јавуваат локалните медиуми.
ЕТА е формирана на 31 јули 1959 година и се бори за независност на Баскија. ЕУ и САД ја сметаат за терористичка организација. Од шеесеттите години досега бројот на жртвите што ги ликвидира ЕТА е 829. Групата не извршила терористички напади од 9 август минатата година.