Париз, 14 септември 2010 (МИА) - Европската комисија најави дека има намера да започне процес против Франција поради кршење на европското право при протерувањето на бугарските и романските Роми, јави дописникот на МИА од Париз.
Одлуката на Брисел доаѓа откако францускиот печат објави дека од Кабинетот на министерот за внатрешни работи до префектите биле испратени три циркуларни писма во кои јасно се бара од нив евакуација на триста диви населби, со приоритет на ромските.
Само во текот на август, Париз кон Романија и Бугарија протера околу 1.000 Роми, тврдејќи дека тие се вратиле доброволно и дека нивното протерување не било колективно.
Минатата недела Европскиот парламент во Стразбур изгласа резолуција со која се бара од Франција да прекине со протерувањето на Ромите, но резолуцијата беше отфрлена од француските власти како неоснована.