Париз, 16 септември 2010 (МИА) - Повикувајќи се на европски извори и на изјава на бугарскиот премиер Бојко Борисов, француските медиуми јавуваат дека претседателот на Франција Никола Саркози и претседателот на Европската комисија Жозе Мануел Баросо размениле „жестоки зборови“ околу протерувањето на Ромите од Франција кон Бугарија и Романија, јави дописникот на МИА од Париз.
Наспроти критиките кои францускиот претседател ги изрекол на сметка на Европската комисија, Баросо жестоко ја бранел институцијата и нејзината улога.
За време на работната сесија пред ручекот, шефот на француската држава зел збор за да се пожали дека „Комисијата ја повредила Франција“ споредувајќи го протерувањето на романските и бугарските Роми со депортациите за време на Втората светска војна.
Европската Комисија се сомнева дека Франција со протерувањето на Ромите ги прекршила европските закони за слободата на движење и се закани дека ќе отвори процедура против Париз пред Судот во Луксембург.