Будимпешта, 5 октомври 2010 (МИА) - Две лица загинаа, три се сметаат за исчезнати, а повеќе десетина се повредени во Унгарија, во излевањето на хемиски отпад меѓу местата Ајка и Девечер, во западна Унгарија, изјави министерот за внатрешни работи Шандор Пинтер.
Околу 700.000 кубни метри хемиски отпад се излеаја по хаваријата на резервоарот во една фабрика за преработка на алуминиум, 165 километри западно од Будимпешта.
Над 60 лица се здобиле со повреди, од кои десетина се во животна опасност. Во тек е истрага за причините за несреќата.
Портпаролот на Министерството за вонредни состојби Ѓерѓи Бакош рече дека пожарникарите се упатени да ги евакуираат децата од локалните училишта, откако патниот и железничкиот сообраќај во областа се онеспособени.
Излевањето на отпадот загрози околу 400 куќи, односно една третина објекти во селото Девечер. Противпожарникарите го повикаа локалното население да ја напушти областа и тоа со трактори е одвезено од куќите.
Службата за информации за железничкиот сообраќај соопшти дека возовите меѓу местата Колонтар и Девечер, на линијата Будимпешта - Секешфехервар - Сомбатељ не сообраќаат и оти патниците ги превезуваат со автобуси.