Лондон, 7 октомври 2010 (МИА) - Московски убавици позираа во долна облека за календар посветен на рускиот премиер Владимир Путин, пишува денеска британскиот весник „Дејли телеграф“.
Младите дами, кои се студентки по новинарство на Московскиот универзитет, се разголеа за календарот кој се подготвува во чест на роденденот на Путин, кој ќе го прослави денеска.
На првата страница на календарот е напишано: „Владимир Владимирович, Те сакаме. Среќен Роденден!“.
Путин денеска полни 58 години.
Една од учесничките во фотосесијата, студентката Лена Горностаева, која позираше на страницата за месец март, му го честиташе роденденот на премиерот со зборовите: „Ти ги изгасна шумските пожари, но јас продолжувам да горам“.
Портпаролката на факултетот по новинарство при Московскиот универзитет Лариса Бакулина не ја одобри ваквата идеја на студентките за оригинален подарок за Путин, нарекувајќи ја „невкусна“.
Педесет илјади копии од календарот веќе се пуштени во продажба во Москва, а еден чини 260 рубљи (8,71 долар).
Девојките позирале за календарот бесплатно. Според издавачот Владимир Табак ваквата идеја има за цел да покаже дека моделите кои позирале за календарот не се само убавици туку се млади жени со изградени политички убедувања.