Москва/Грозни, 19 октомври 2010 (МИА) - Според најновите податоци на федералниот антитерористички комитет и републичките истражни органи, седум лица загинаа, а 17 се повредени во денешниот вооружен екстремистички напад врз зградата на чеченскиот Парламент.
Претставничката на републичката управа на Истражниот комитет Марјам Налајева додаде дека според првичните податоци загинале двајца припадници на полицијата и еден службеник на Парламентот, а повредени се шестмина полицајци и 11 цивили.
Националниот антитерористички комитет соопшти дека во нападот учествувале четворица екстремисти, од кои двајца по влезот во зградата активирале експлозивни направи. Другите двајца напаѓачи се убиени во нападот.
Чеченскиот заменик министер за внатрешни работи Роман Едилов објасни дека екстремистите до собраниската зграда пристигнале со автомобил, веднаш зад возилото на еден од пратениците.
Чеченските служби за безбедност категорично ги демантираа претходно објавените информации дека напаѓачите зеле заложници.
Претседателот на чеченскиот Парламент Дукуваха Абдурахманов не е меѓу жртвите, тој навреме бил евакуиран.
Центарот на Грозни останува затворен. На местото на инцидентот се испратени специјални сили и „екипи од сите оперативни служби“.
За инцидентот е информиран рускиот министер за внатрешни работи Рашид Нургалиев, кој е во обиколка на Северен Кавказ. Во моментот тој одржува информативно советување во чеченското МВР, соопшти федералното Министерство за внатрешни работи.