Берлин, 10 ноември 2010 (МИА) - Поранешниот германски канцелар Герхард Шредер денеска демантираше дека на некогашниот американски претседател Џорџ Буш му ветил поддршка за инвазија на Ирак, а потоа тоа го прекршил, како што тоа Буш го напишал во своите мемоари „Одлучувачки моменти“.
Германското радио „Дојче веле“ објави дека Буш ја користи книгата со цел да се пресмета со оние кои тогаш, очевидно, го разочарале - тогашниот руски претседател Владимир Путин, францускиот претседател Жак Ширак и, пред се, Шредер.
Буш во книгата напишал дека Шредер бил еден од државниците „кого било најтешко да се процени“, додавајќи дека ја ценел неговата поддршка во Ирак и Авганистан, но „германскиот канцелар подоцна ја злоупотребил неговата доверба“.
Поранешниот германски канцелар веднаш реагираше, објаснувајќи дека „Буш не ја зборува вистината“ и дека неговата поддршка важела само во случај Ирак навистина да поседува оружје за масовно уништување.