Брисел, 6 декември 2010 (МИА) - Главни теми на Самитот Европска унија - Русија, што денеска се одржува во Брисел, ќе бидат заедничките предизвици со кои се соочува Брисел и Москва, како и глобалната економија и климатските промени.
На самитот ќе се разговара и за билатералните односи, вклучително и програмата Партнерство за модернизација, но и за регионалните и меѓународните прашања.
На денешниот состанок ќе учествуваат претседателот на Советот на ЕУ Херман Ван Ромпуј, претседателот на Европската комисија Жозе Мануел Баросо, високиот претставник на Унијата за надворешна политика и безбедност Кетрин Ештон и комесарот за трговија Карел де Гухт, додека Москва ќе биде претставена од претседателот Дмитриј Медведев и шефот на руската дипломатија Сергеј Лавров.
- Мило ми е што повторно ќе се сретнам со претседателот Медведев. Овој самит ќе ни даде сјајна можност да разговараме за резултатите од самитот Г-20 одржан во Сеул и за економското заздравување. Ќе разговараме и за напредокот на билатералните односи, за членството на Русија во Светската трговска организација, за визниот режим, за соседството и за човековите права истакна Ромпуј.
Баросо наведе дека самитот ќе биде фокусиран „на европско-рускиот договор и на програмата Партнерство за модернизација, што е клучна за поддржување на политичките и економските реформи во Русија“.