Москва, 20 декември 2010 (МИА) - Специјалниот известител на ПССЕ, Дик Марти изјави денеска дека не стравува за својот живот.
- Не стравувам, изјави Марти на прес конференција одговарајќи дали се плаши од физички напад на Албанци откако во свој извештај го означи косовскиот премиер Хашим Тачи како водач на криминална група која од 1999 година на Косово се занимавала со трговија со човечки органи, оружје и дрога.
Марти кој во Москва разговараше со официјални лица за руско-грузиските односи, се осврна на извештајот, кој според руски медиуми предизвикал ефект на „разорна бомба“.
Марти утре ја завршува посетата на Москва.
Шефот на руската дипломатија Сергеј Лавров минатата недела изјави дека Русија е многу вознемирена поради информациите за можна вмешаност на актуелното косовско раководство во злосторства против човештвото.
Нацрт-извештајот на Марти за Косово ќе се најде на дневен ред на ПССЕ во јануари.