Москва, 26 јануари 2011 (МИА) - Во црквите „Света Тројца“ и „Свети Тихон“ во Москва денеска беше отслужена панихида во спомен на загинатите во нападот на аеродромот „Домодедово“, на кои присуствуваа премиерот Владимир Путин и претседателот Дмитриј Медведев.
Панихида беше отслужена и на терминалот за пристигнување на патниците на аеродромот „Домодедово“.
Во моментот во неколку московски болници се лекуваат 117 лица повредени во нападот. Според министерот за здравство и социјална политика на Русија Татијана Голикова тројца од повредените се наоѓаат во многу критична здравствена состојба. Седумнаесет од повредените лица се странски државјани од Германија, Италија, Нигерија, Молдавија, Србија, Словачка, Словенија, Таџикистан и Франција.
Досега се идентификувани 34 од 35-те загинати во самоубиствениот напад на аеродромот „Домодедово“. Во наредните денови следува погребот на загинатите лица кои биле жители на Москва.
Претставниците на „Домодедово“ официјално предупредија дека пристапот до салите на аеродромот може да одземат до 30 минути поради воведените нови строги безбедносни мерки и новиот систем на целосна проверка на сите патници.