Рим, 13 февруари 2011 (МИА) - Неколку илјади жени денеска протестираа ширум Италија поради сексуалниот скандал во кој е вмешан премиерот Силвио Берлускони, наведувајќи дека со тоа е повредено нивното достоинство и оти се засилиле застарените стереотипи кои се однесуваат на половите.
Италијанките се прошетаа на улиците на Неапол и Палермо барајќи оставка на Берлускони. Тие носеа транспаренти и извикуваа „Италија не е јавна куќа“.
Протестната прошетка во повеќе од 200 италијански градови ја предводеа актерки, политичарки и други познати жени, а слични протести ќе бидат одржани и во други држави.
Обвинителството во Милано минатата недела побара против Берлускони неодложно да бидат покренати обвиненија за секс со малолетна проститутка и за злоупотреба со службената положба.
Седумдесет и четиригодишниот Берлускони тврди дека не е виновен за двете обвиненија, за кои беше покрената истрага од крајот на декември. Според него, таквите обвиненија се срамни.