Лондон, 10 март 2011 (МИА) - Британскиот министер за надворешни работи Вилијам Хејг и шефот на германската дипломатија Гвидо Вестервеле испратија заедничко писмо до Европската Унија и до баронеса Ештон, министер на ЕУ за надворешни работи, во кои се залагаат за потребата од постоење на еден „обединет фронт“ против режимот на полковникот Гадафи, јави дописникот на МИА од Лондон.
Хејг и Вестервеле се согласуваат да се испитаат сите патишта за воведување на дополнителни санкции кон Либија, но ги повикуваат владите од ЕУ да се согласат со прекин на комуникацијата и соработката со режимот во Триполи.
Во заедничкото писмо, двајцата шефови на дипломатија истакнуваат дека Гадафи „мора да се тргне од власта, за да се отвори пат за вистинска демократска трансформација“ во оваа северноафриканска земја.
Велика Британија продолжува со настојувањето да обезбеди што е можно повеќе сојузници за нејзината политика за соборување на Гадафи.
Претставник на Форин Офисот синоќа објасни дека од почетокот британската дипломатија е предводник на една таква политика, но инсистираше дека заложбите во писмото не значат и прекин на дипломатските односи со Либија.
- Сакаме да се постигне е целосна изолација на полковникот Гадафи, рече претставникот на министерството во Лондон.
Соопштението за заедничкото писмо на министрите за надворешни работи на Велика Британија и на Германија доаѓа непосредно по острата дебата во Долниот дом на британскиот Парламент околу либиската криза.
Опозициските Лабуристи ја обвинуваат Владата и шефот на Форин офисот Хејг за „цела низа од грешки, погрешни проценки и лоши акции“ околу кризата во Либија.