Рим, 11 мај 2011 (МИА) - Стравувајќи од урбаната легенда дека Рим денеска ќе биде погоден од катастрофален земјотрес, многумина жители на италијанскиот главен град решија да ги напуштат своите домови, наспроти предупредувањето на експертите дека е невозможно предвидување на таков потрес.
Пророштвото на самоукиот сеизмолог Рафаело Бенданди дека на 11 мај 2011 година катастрофален земјотрес ќе го срамни Рим со земја, беше главна тема на разговор меѓу жителите на италијанскиот главен град. Ваквото пророштво на Бенданди брзо се прошири во јавноста пред се благодарение на социјалните мрежи и разните интернет форуми.
Во намалувањето на стравот не помогнаа ни апелите на началникот на италијанската Цивилна заштита и на првиот човек на Националниот институт за геофизика и вулканологија, кои нагласија дека станува збор за непотребни стравувања.
Сеизмолозите нагласуваат дека стравувањата се неоправдани имајќи предвид дека во Рим не бил регистриран посилен земјотрес во последните илјада години. - Под градот никогаш не се забележани силни земјотреси, изјави директорот на Институтот за геофизика и вулканологија, Енцо Боски.
Италијанскиот весник „Република“ нагласува дека и покрај ваквите смирувачки тонови, Римјаните уште еднаш се докажаа како „фаталисти и експерти за внимателност“. Следејќи го мотото „не е точно, но сепак верувам“, многумина се решија да го напуштат градот, да не ги пуштат децата во училиште и да заминат на одмор, истакнува „Република“.
Весникот наведува дека според неофицијални податоци број вработени кои за денеска најавиле „одмор или слободен ден“ е меѓу 15 и 20 проценти поголем во споредба со 11 мај 2010 година. Во многу училишта родителите се јавиле и прашувале дали денеска ќе се одржува редовна настава.
- Не може да се говори за егзодус на населението, но сепак има случаи кога цели семејства решија да го напуштат градот и да заминат на село, наведува „Република“.