Луксембург, 9 јуни 2011 (МИА) - Министрите за внатрешни работи на ЕУ не изразија интерес на денешната средба во Луксембург за заострување на правилата во Шенген зоната за слободно движење - идеја која беше претставена од Франција и Италија.
По спорот меѓу двете земји за протокот на имигранти од Северна Африка тие предложија да се промени договорот за Шенген, за да стане полесно воведувањето на времена гранична контрола. Европската комисија минатиот месец објави дека е отворена кон идејата. Но останатите членки од ЕУ не покажаа со ништо дека ја споделуваат таа позиција.
- Сметаме дека не е неопходно да се менува Шенгенскиот договор во овој момент, рече шпанскиот министер за внатрешни работи Антонио Камачо.
Сегашните правила дозволуваат на владите од ЕУ да ја обноват граничната контрола при големи настани или средба на врвот, но не и во случај на неочекуван проток на имигранти, како што предложија Шведска и Германија.
Германија денеска одново го критикуваше решението на својот сосед Данска да ја врати постојаната царинска контрола по границите, истакнувајќи дека не треба да се става под сомнение слободното движење на Шенген зоната.