Лондон, 18 јули 2011 (МИА) - Комесарот на Скотланд Јард Пол Стивенсон, највисокиот полициски функционер во Велика Британија, поднесе неочекувано оставка, поради скандалот со прислушувањето на мобилната телефонија на новинарите на „
Њуз оф д Ворлд“, како и поради тврдењата за поткупот на полицајци за добивање информации, јави дописникот на МИА од Лондон.
Стивенсон поднесе оставка под притисок на британската опозиција, откако беше осомничен за поврзаност со Нил Волис, поранешен уредник на сега веќе згаснатиот весник на мардоковата медиумска империја. Волис минатата недела беше уапсен од полицијата во врска со скандалот.
Полицискиот комесар Стивенсон беше поврзуван со Волис, бидејќои го ангажирал за надворешен советник поранешниот уредник на „Њуз оф д Ворлд“, кој сега работи за една ПР агенција. Освен тоа Стивенсон на почетокот од оваа година прифатил пет недели да престојува во едно луксузна бања, каде Волис бил ПР советник.
Во соопштението за медиумите, шефот на британската полиција изјави дека си заминува од функцијата во обид да се прекинат спекулациите и обвинувањата околу целиот овој случај, но нагласува дека не прифаќа вина за она што го направил.
Стивенсон поднесе оставка само неколку часа по исто така неочекуваното апсење на Ребека Брукс, поранешен главен директор на Њуз Интернешнл за печатените медиуми. По сослушувањето, таа беше пуштена со кауција. Нејзиниот портпарол изјави дека апсењето е „изненадувачки потег“ на полицијата, затоа што таа во неделата попладнето сама отишла во една полициска станица во центарот на Лондон, на претходно договорен разговор околу истрагата на скандалот со прислушувањето и подмитувањето на полицајците. Во вторник таа би требало да се појави како сведок пред една парламентарна комисија, заедно со Руперт Мардок и неговиот син Џејмс.
Премиерот Дејвид Камерон изрази жалење поради оставката на комесарот Пол Стивенсон, а Даунинг стрит 10 ги демантираше тврдењата на медиумите дека врз комесарот на Скотланд Јард бил вршен притисок да си замине од функцијата.