Париз, 19 јули 2011 (МИА) - Францускиот министер за одбрана Жерар Лонге изјави денеска дека почнало „обратното одбројување“ за повлекување на либискиот лидер Моамер Гадафи.
- Сигурен сум дека обратното броење веќе започна и дека нештата може да се одвиваат побрзо, отколку што се очекуваше. Во секој случај сум внимателен, бидејќи Гадафи не дејствува рационално и може да ја избере „стратегијата на бункерот“, земајќи го за заложник цивилното население во Триполи, истакна Лонге пред телевизијата „Франс 2“.
Според францускиот министер ситуацијата се развива во позитивна насока, бидејќи либиското јавно мислење според сите извори денес е апсолутно убедено дека Гадафи повеќе нема иднина.
- Жени и мажи, кои во животот не зеле оружје во своите раце, одлучија да се организираат и повеќе да не ја трпат воената диктатура на Гадафи. Иако на противниците на Гадафи им беа потребни месеци за да се подготват за активности, кои инаку никогаш не би ги вршеле, изминатите недели бележат очигледен напредок, истакна Лонге.