Париз, 20 јули 2011 (МИА) - Моамер Гадафи може да остане во Либија доколку ја предаде целата власт, изјави денеска францускиот министер за надворешни работи Ален Жипе.
На прашањето дали земјите кои учествуваат во либиската воена операција би му дозволиле на Гадафи да остане во Либија како дел од евентуалното решение за надминување на кризата, Жипе одговори дека „едно од сценаријата, кои се сметаат за реални, е тој да остане во Либија под еден услов, а тоа е веднаш да се повлече од политичкиот живот“.
- Евентуалното примирје би зависело од одлуката на Гадафи јасно и официјално да замине од воените и цивилните функции, кои ги извршува. Прашањето е не дали Гадафи ќе се повлече, туку кога?, истакна шефот на француската дипломатија.
Двајца членови на либискиот Преоден национален совет (ПНС) треба денеска да се сретнат со францускиот претседател Никола Саркози во Париз. Франција е првата земја која официјално го призна советот за легитимна власт во Либија и прва која изврши воздушни напади врз воени објекти на Гадафи на почетокот на март годинава.
- Што се однесува до преговори со режимот во Триполи, такви моментално не се водат. Контактите со режимот целосно се префрлени на ОН, додаде Жипе.