Осло, 22 јули 2011 (МИА) - Еден познат екстремист порача преку интернет дека бомбашкиот напад кој денеска е извршен во центарот на Осло, а во кој според најновиот полициски извештај загинаа најмалку седум лица, претставува „лекција“ и порака за европските земји од муџахедините.
Според американската служба за следење на исламистичките сајтови (SITE), екстремистот кој пишува под името Абу Сулејман ал-Насер во својата порака на заштитениот форум „Шумук ал-Ислам“ наведува дека овие бомбашки напади „се уште една порака која стигнува во европските земји од муџахедините“.
Лидерите на Ал Каеда досега на Норвешка, која е членка на НАТО, повеќе пати и се заканувале поради нејзиното учество во војната во Авганистан, а оваа скандинавска земја учествува и во воздушната операција во либија, чиј лидер Моамер Гадафи се закани дека ќе возврати со напади на Европа. Денешниот напад во Осло се случи нешто повеќе од една година откако три лица беа уапсени поради сомневање дека се поврзани со Ал Каеда и дека планирале да извршат напади врз цели во Норвешка.
Полицијата засега нема потврдено дали станува збор за терористички напад, ниту кој би можел да стои зад овие експлозии.