Брејвик најверојатно нема да биде прогласен за непресметлив

Осло, 31 јули 2011 (МИА) - Андерс Беринг Брејвик, осомничен за нападите во центарот на Осло и за масакрот на островот Утоја на 22 јули, најверојатно нема да биде прогласен за непресметлив, изјави доктор Тарјеј Ригнејстад, шеф на Комисијата која треба да ја разгледа неговата психијатриска евалуација.

Ригнејстад, шеф на Норвешкиот одбор за судска медицина изјави дека осомничениот владеел со своите постапки. Во Норвешка повикувањето на непресметливост во текот на одбраната подразбира дека обвинетиот бил во состојба на психоза во текот на злосторот, што значи дека изгубил контакт со реалноста до таа мерка што не владеел со своите постапки.

- Не изгледа дека бил психотичен, рече доктор Ригнејстад.

Комисијата треба да ја разгледа и усвои евалуацијата на двајцата психијатри кои ги назначи судот пред судијата да одлучи дали Брејвик подлежи на кривична одговорност.

Брејвик е обвинет  за смртта на 77 луѓе.