Лондон, 10 август 2011 (МИА) - Насилството што во саботата започна во британскиот главен град по убиството на еден 29-годишен маж од страна на полицијата, верижно се шири низ Велика Британија, па така по Лондон, Бирмингем, Ливерпул и Бристол, минатата ноќ ги зафати и Вулверхемптон, Вест Бромвич, Манчестер, Нотингем и Лутон.
Во Лондон, каде вчера беа распоредени дополнителни 16.000 полицајци, синоќа до полноќ беше мирно, по што имаше немири во квартот Тотенхем, каде и започнаа нередите во саботата. При ноќешното дивеење на насилниците во Тотенхем запален е центар за рециклирање.
Жестоки судири имаше и во Манчестер, каде група маскирани лица се судрија со полицијата во центарот на градот. Насилниците кршеа излози на продавниците, подметнуваа пожари, ограбуваа и маваа по полицајците со тврди предмети.
Околу 40 лица со молотови коктели синоќа нападнале полициска станица во Нотингем. По нападот во станицата избувнал пожар, кој набрзо е изгаснат. При инцидентот нема повредни, а полицијата уапсила осумина учесници во нападот.
Во неколкудневното насилство низ улиците на британските градови досега загина едно лице. Како што соопшти полицијата станува збор за 26-годишник, кој вчера им подлегнал на повредите од огнено оружје здобиени во текот на викендот. При немирите се повредени стотина полициајци, а уапсени се 685 насилници.
Повод за протестите беше убиството на 29-годишниот Марк Даган во четвртокот, кој беше застрелан од страна на полицијата при обид за негово апсење. Според медиумиските извештаи за настанот, полициајците не биле загрозени кога отвориле огран врз Даган, кој полициски извори го посочуваат како нарко дилер и криминалец. Неговото семејство меѓутоа ги негира ваквите тврдења, нагалсувајќи дека тој бил добар татко и почитуван член на заеднциата.