Лондон, 23 август 2011 (МИА) - Повеќе видови специјални авиони за набљудување, прислушување и за разузнавање од воздухот на британското воено воздухопловство (РАФ) се вклучени во широката потрага по полковникот Моамер Гадафи, јави дописникот на МИА од Лондон.
Висок владин претставник, чиј идентитет не се открива, признава дека Британците и нивните сојузници во либиската воена интервенција, трагаат по Гадафи во обидот тој да биде пронајден и уапсен.
- Ние не знаеме каде можеме да го најдеме, но го уверуваме дека сите „очи“ со кои располагаме, трагаат по него, изјави владиниот претставник за весникот „Дејли телеграф".
На последниот состанок на британскиот Совет за безбедност, одржан по навлегувањето на либиските бунтовнички сили до центарот на Триполи и неговиот Зелен плоштад, премиерот Дејвид Камерон побарал од армијата да ја даде на користење целата софистицирана опрема, со која располага, за да се помогне во трагањето по Гадафи.
Воени и разузнавачки експерти сметаат дека тој се крие низ подземните тунели во либискиот главен град, кои се изградени во осумдесетите години на 20 век. Тунелите многупати досега беа бомбардирани од авионите на НАТО, па се верува дека се тешко оштетени или се разурнати. Шпионските сателити во исто време може да го откријат секој обид за полетување и летање над либиската територија, на секаков вид летало. Во операцијата за „ловење" на Гадафи се вклучени британските авиони за откривање на тајни скривалишта, за прислушување на мобилни и сателитски телефони, како и еден американски шпионски авион, оспособен за пронаоѓање траги од возила во пустина.
Разузнавачите на теренот, на кои се повикуваат медиумите, веруваат дека Гадафи би можел да побегне од Либија, користејќи го своето родно место Сирт, каде се смета дека има скриено многу оружје за помагање при извлекувањето или преку пустината, во некоја од африканските земји. Како земја спонзор на извлекувањето на Гадафи од Либија во Лондон се посочува Јужна Африка, која од почетокот на либиската граѓанска војна се противи на воената интервенција на Западот и на земјите-членки на НАТО.
Јужноафриканските власти демантираат дека Гадафи е кај нив, инсистирајќи иднината на земјата и на нејзиниот лидер да го решат меѓусебе Либијците, а не странците. Откривањето на операцијата за ловење на Гадафи доаѓа по појавувањето на неговиот син Саиф ал Ислам синоќа во Триполи и покрај потврдата од Меѓународниот кривичен суд дека тој е уапсен и задржан од бунтовничките сили.