Москва, 7 октомври 2011 (МИА) - Рускиот премиер Владимир Путин денеска го прослави својот 59-ти роденден во друштво на италијанскиот колега Силвио Берлускони и поранешниот германски канцелар Герхард Шредер, пренесоа француските медиуми.
Се очекува Путин и неговите гости, кои одамна оддржуваат пријателски односи со него, да ја минат вечерта во една од руските резиденции, посочи портпаролот на премиерот Дмитриј Песков.
Овој посебен ден за него беше одбележен од мноштво љубопитници и по некои доста дрски истапи, организирани од младите почитувачи на премиерот кои се нарекуваат „Армијата на Путин“ или „Навистина го сакаме Путин“.
Имаше и нешто уште понеобично - група жители на Санкт Петербург (родниот град на премиерот) изјавија дека во дворот на кооперацијата имаат намера да постават статуа на лабрадорот на Путин - Кони.
Рускиот патријарх Кирил на Путин му испрати порака со поздрави.
Неговите опоненти, меѓутоа, се однесуваа ладно кон неговиот роденден затоа што денеска исто така се навршуваат пет години од сеуште неразјаснетото убиство на опозициската новинарка Ана Политковскаја.