Рим, 9 ноември 2011 (МИА) - Италијанскиот премиер се пожали дека немал доволно власт како претседател на Владата, и се спореди со поранешниот диктатор Бенито Мусолини, кој исто така жалел дека може само да дава препораки.
- Уморен сум од тоа дека не успеав да го диктирам курсот и не можев да ја спроведам политиката која ја сакав. Се чувствувам посилен како слободен граѓанин, отколку како премиер, истакна Берлускони во интервју за весникот „Стампа“.
- Читав една книга за писмата на Мусолини до Кларета, каде тој во еден момент вели: „Ти не разбираш дека не ме сметаат за ништо. Јас можам само да давам препораки“. Ете, јас се наоѓам во истата ситуација, објаснува 75-годишниот Берлускони.
На прашањето за разликите со фашистичката диктатура, италијанскиот премиер одговори дека тој „секако не е диктатор, каков што го прикажувале медиумите“.
- Сакам само да кажам дека татковците на нашиот Устав - токму од страв да не се повтори историјата, прекумерно ја ослабнаа извршната власт, додаде Берлускони.