Рим, 12 ноември 2011 (МИА) - Силвио Берлускони вечерва поднесе оставка на функцијата премиер на Италија, јавија италијанските медиуми. Тој му ја врачи оставката на претседателот Џорџо Наполетано откако претходно одржа состанок со раководството на неговата партија.
Тоа беше очекувано откако пред неколку часа Долниот дом на италијанскиот Парламент го усвои пакетот економски реформи кои ги побара Европската унија, за да се избегне кризата да се прошири во таа држава. Горниот дом на Парламентот, Сенатот, тоа го направи вчера, па на тој начин е изгласан буџетскиот закон кој содржи реформски мерки.
Неколку илјади демонстранти вечерва излегоа на улиците на Рим за да ја поздрават неговата оставка.
Берлускони, кој не успеа да обезбеди мнозинство во текот на клучното гласање одржано во вторникот, вети дека ќе се повлече од функцијата кога Парламентот конечно ќе ги усвои економските мерки, што од Италија ги побараа европските партнери со цел да се врати довербата на пазарот во италијанските јавни финансии.
Тој пред неколку дена рече дека Италија треба да покаже дека е способна за сериозни реформи и единствената реална можност за излез од политичката криза се нови избори.
Се очекува, поранешниот член на Европската комисија Марио Монти да добие задача да се обиде да формира нова администрација која ќе се соочи со растечката финансиска криза во Италија.