Рим, 16 јануари 2012 (МИА) - Уште едно тело е пронајдено во внатрешноста на насуканиот италијански патнички брод „Коста Конкордија“, со што бројот на жртвите достигна шест лица, а 14 се уште се водат како исчезнати.
Екипите, кои продолжуваат да го пребаруваат полупотонатиот брод, ја откриле шестата жртва на втората палуба, во оној дел од бродот кој се уште е над водата. Телото е на патник, маж кој на себе имал појас за спасување.
Од компанијата сопственик на бродот, кој во петокот вечерта се насука во близина на брегот на Тоскана, соопштуваат дека најверојатно причина за несреќата е груба грешка при управувањето на огромниот брод.
Во соопштението на компанијата засега не се истакнува како ќе бидат обесштетени патниците од бродот.