Капетанот на крузерот “Коста Конкордија“, Франческо Скетино, изјавил дека бродот во моментот на несреќата, што се случи кај островот Џиљо во Италија, пловел близу до брегот оти тоа од него го барале неговите шефови.
Италијанските медиуми објавија информација дека Скетино им рекол на истражните органи дека поздравувањето на луѓето на крајбрежјето била идеја на шефовите како и дека тоа се прави заради јавноста.
“Тие рекоа дека ќе бидеме видени и дека ќе добиеме публицитет“, рекол капетанот.
Тој дури им рекол на истражните органи дека компанијата планирала поминување и поздравување на граѓаните за време на локални државни празници.
Според последните извештаи, бројот на загинати во бродоломот што се случи на 13 јануари, се искачи на 13, додека 19 се’ уште се водат како исчезнати. Спасувачите продолжуваат со потрагата, но само на површината на морето поради исклучително лошите временски услови.
Скетино се наоѓа во домашен притвор, а осомничен е за повеќекратно убиство поради тоа што го напуштил бродот додека на него се’ уште имало патници.