Лил, 22 февруари 2012 (МИА) - Поранешниот извршен директор на Меѓународниот монетарен фонд (ММФ) Доминик Строс-Кан, кој вчера беше приведен под сомнение за соучесништво во сводништво и прикривање злоупотреби, денеска е ослободен од притвор во северниот француски град Лил, пренесоа француските медиуми, повикувајќи се на свои дописници.
Адвокатката на Строс-Кан, Фредерик Болио, изјави дека нејзиниот клиент е целосно ослободен откако бил сослушан. Тој совршено мирно им одговарал на прашањата на иследниците.
Полицијата во Лил истражува претпоставена мрежа за проституција во Франција и Белгија со замешани полицајци и други претставници на властите.
Строс-Кан бил распрашан во врска со неговото претпоставено учество во „слободни вечери“, посебно во Париз и Вашингтон, за да се утврди дали знаел дека поканетите жени се проститутки. Серија патувања на проститутките биле организирани и финансирани од двајца француски бизнисмени, посочуваат француските медиуми.