Париз, 19 март 2012 (МИА) – Убиството на четирите лица, меѓу кои и три деца во денешниот напад во еврејско училиште во градот Тулуз во југозападниот дел на Франција, најверојатно е злосторство на еден ист човек кој минатата недела во Тулуз, а потоа и во Монтобан уби четворица и тешко рани еден француски војник.
Како што јави дописникот на МИА од Париз, едно од оружјата, според пронајдените чаури кое го користел изутринава, било исто како и тоа што беше користено при нападите врз војниците, а ист е и начинот на бегство со мотоцикл.
Францускиот министер за внатрешни работи Клод Геан напомена за сличности меѓу двата напади и неодложно нареди да се засили обезбедувањето околу еврејските училишта во земјата.
Ако во овај напад жртвите беа од еврејската заедница, во претходните напади жртвите беа со арапско потекло и еден од француските Антили.
Францускиот претседател Никола Саркози се појави на местото на настанот во Тулуз придружуван од Ришар Паские, претседателот на Советот на еврејските заедници во Франција и од министерот за образование Лук Шател.
Кандидатот на социјалистите Франсоа Оланд исто така најави дека заминува за Тулуз за да ја изрази „солидарноста со семејствата и еврејската заедница во Франција.