Тулуз, 21 март 2012 (МИА) - Мухамед Мерах, осомничен дека вчера во пукотницата пред еврејското училиште во Тулуз убил четири лица, денеска е уапсен во станот во кој бил забарикадиран откако полицијата ја опколила зградата, јавија медиумите.
Мерах (24), француски државјанин од алжирско потекло кој за себе тврди дека е исламистички милитантен активист, уапсен е по 12-часовна операција на специјалната полиција, јавија француските телевизии БФМ и Теле, повикувајќи се на полициски извори.
Веста, што во меѓувреме ја презедоа и британските и другите медиуми, меѓутоа, се уште не е официјално потврдена.
Во текот на попладнето се очекува францускиот претседател Никола Саркози да и се обрати на нацијата.
Мерах е осомничен и за убиството на тројцата француски војници од минатата недела, со оглед на тоа дека, според досегашните информации, во тој напад било искористено истото оружје како и во вчерашниот масакр, во кој беза убиени рабин и три деца.
Осомничениот напаѓач на преговарачите им изјавил дека тоа го сторил „за да ја казни француската војска за меѓународната интервенција и страдањата на палестинските деца“, пренесоа француските медиуми.
Неговиот чин предизвика осуда и зачуденост меѓу официјалните лица во Франција и ширум светот, меѓу верските поглавари и медиумите.
Мерах, пред пет години бил осуден на затворска казна во Авганистан заради бомбашки напад, но со помош на талибансиките бунтовници успеал да побегне од затвор, јавија британските медиуми.
Началникот на затворот во Кандахар Гулам Фарук, повикувајќи се на затворската документација, тврди дека авганистанските сили за безбедност го уапсиле Мерах на 19 декември 2007 година и дека бил осуден на три години затвор заради поставување бомби во јужната провинција Кандахар.
Од затворот Сарпосм, на југот на земјата, тој избегал во јуни 2008 година, заедно со 1.000 други затвореници, вклучувајќи и 400 талибански бунтовници, кога талибанците активирале експлозив со кој бил наполнет еден камион и со кого го разнеле главниот влез на затворот, тврди Фарук.