Париз, 22 март 2012 (МИА) - Не знаеме дали Мохамед Мерах е жив или мртов. Од синоќа нема никакви знаци на живот. Се надеваме дека е жив, изјави утрово францускиот министер за внатрешни работи Клод Геан.
Геан истакна дека од синоќа полицијата нема никаков контакт со него. - Синоќа Мерах рекол дека сака да умре со оружје во рака, додаде министерот.
Мерах се крие во станот во зграда во Тулуз, опколена 30 часа од елитни единици за борба против тероризмот.
Во текот на ноќта полицијата активира три експлозиви до зградата, за да го заплаши и да му изврши притисок. Исклучена е струјата во целиот реон. Во зградата е запрено и снабдувањето со вода и гас.
Мерах вчера првично изјави дека ќе се предаде во попладневните часови, но потоа се откажа, изјави извор близок до истрагата. - Од синоќа тој изгледа не сака да се предаде и е многу одлучен во тоа, додаде изворот.