Ватикан, 21 февруари 2013 (МИА) - Папата Бенедикт Шеснаесетти одлучи да абдицира откако внатрешната истрага открила секс скандали и корупција во Ватикан, објави денеска италијанскиот весник „Република“ повикувајќи се на неименувани извори.
Тројца кардинали, меѓу кои и поранешниот шеф на ватиканските тајни служби, требаа да ги проверат тврдењата за финансиски малверзации, непотизам и корупција, кои излегоа во јавност по објавувањето на доверливите папски документи од страна на секретарот на папата, Паоло Габриеле. На 17 декември минатата година тројцата кардинали го предале извештајот, од 300 страници, на папата.
- Извештајот бил поврзан со шестата и седмата божја заповед, кои гласат „Не врши прељуба“ и „Не кради“, изјавил за „Република“ неименуван извор.
Истрагата открила тајна мрежа на хомосексуалци во Ватикан кои организирале секс средби на неколку места во Рим и во Ватикан.