Киев, 3 декември 2013 (МИА) - Приврзаници на евроинтеграцијата на Украина утрово повторно ја блокираа зградата на Владата во Киев.
Колона демонстранти, предводени од поранешниот украински министер за внатрешни работи Јуриј Луценко, се упатија кон зградата на Владата од „Плоштадот на независноста“, каде ноќта ја минаа околу 5.000 лица.
Опозицијата планира денеска да протестира и во близина на Врховната рада, која треба да ја разгледа предлог-резолуцијата поднесена од група опозициски пратеници за оставка на Владата на премиерот Микола Азаров.
Во непосредна близина на зградата на Врховната рада е поставена и бина, која е подготвена за митинг на владејачката Партија на регионите, а околу неа се распоредени речиси 20 автобуси со полицајци.
На синоќешната средба со амбасадори од земјите на ЕУ, Азаров истакна дека „при евентуален обид да се преземе Врховната рада, веднаш, согласно законот, ќе интервенира обезбедувањето и нема да го дозволи тоа“.