Киев, 4 декември 2013 (МИА) - Украинските демонстранти ќе успеат во намерата да ја изнудат оставката на претседателот Виктор Јанукович, изјави во интервју за германскиот весник „Билд“ пратеникот Виталиј Кличко, лидер на опозициската партија УДАР, пренесе ИТАР-ТАСС.
-На „Плоштадот на независноста“ се уште има илјадници луѓе кои протестираат. Ваква атмосфера немало уште од „Портокаловата револуција“ во 2004 година, коментира Кличко, еден од водачите на украинската опозиција.
Тој изјави дека одлучил да се кандидира за претседател на Украина за во свои раце да ја преземе ситуацијата во земјата.
- За 20 години независност не се направи ништо, тврди Кличко.
Претседателот на украинскиот Парламент Володимир Рибак денеска го затвори пленарното заседание откако опозицијата ја блокираше работата на Врховната рада. „Ќе се собереме утре“, рече тој.
- Нема смисла да работиме, изјави Арсениј Јаценук, лидер на фракција во партијата на Тимошенко, „Татковина“. Тој повторно побара оставка од Владата на Микола Азаров и пуштање на слобода на деветте приведени учесници на протестните митинзи.
- Во спротивен случај Врховната рада нема да работи, уверуваше опозиционерот.
Над сто демонстранти денеска се собраа крај зградата на Владата во Киев, каде е во тек најновата седница на кабинетот на Азаров. Влезот е ограден со метални огради, а зад нив е поставен кордон од милицајци. Засега демонстрантите не преземаат никакви активности, информира ИТАР-ТАСС.
Околу 30 активисти се обидуваат да им попречат на службениците на владината администрација и Парламентот да влезат во друга зграда, каде се наоѓаат нивните работни простории. Крај влезот дежураат милицајци.
Се уште не можат нормално да работат ниту чиновниците во градската управа на Киев, чија зграда во неделата беше преземена од демонстрантите, посочува руската агенција.
Премиерот Азаров ги повика јавноста, политичките партии и посебно опозицијата „да запрат со ескалација на политичките тензии“.
- Повикот на Западот до Украина да го избегне насилството не ја засега само власта, туку и демонстрантите, изјави Азаров пред министрите.