Киев, 6 декември 2013 (МИА) - Полицијата во Киев ги предупреди синоќа демонстрантите дека ќе преземе остри мерки доколку продолжат блокадите на административните згради, додека премиерот Микола Азаров учесниците во протестите го окарактеризира како „нацисти и криминалци“.
- Полицијата ги презема сите можни мерки со цел овие протестни собири да се одржат мирно, изјави вршителот на должност шеф на полицијата во Киев, Валериј Мазан. - Полицијата нема да се обидува да ги убедува криминалците. Ќе ги користиме сите средства, кои ни ги дозволува законот, додаде тој.
Претходно вчера демонстрантите, кои ја зазедоа зградата на градската управа и протестираат пред седиштето на украинската Влада беа информирани за одлуката на судот, со која се бара од нив веднаш да ја запрат блокадата на административните објекти. - Полицијата им даде рок од пет дена, а по истекот на тој рок ќе преземе соодветни мерки, нагласи Мазан.
Премиерот Азаров го бранеше начинот на кој неговата Влада постапува во кризата во земјата, остро одговарајќи му на шефот на германската дипломатија Гидо Вестервеле, кој својата посета на Киев, каде присуствуваше на конференција на ОБСЕ, ја искористи за искажување на поддршка на демонстрантите.
- Нацисти, екстремисти и криминалци на ниту еден начин не можат да бидат партнери во евроинтеграциите, му порачал Азаров на Вестервеле.