Киев, 10 декември 2013 (МИА) - Илјадници украински демонстранти останаа изминатата ноќ во кампот со шатори во Киев, и покрај истекувањето на крајниот рок за напуштање на улиците.
Полициски единици за борба против нередите ги зазедоа позициите во престолнината на Украина, каде втора седмица по ред продолжуваат протестите против одлуката на претседателот Виктор Јанукович да се откаже од трговскиот договор со ЕУ.
Демонстрантите стравуваат дека пристигнувањето на полициските единици за борба против нереди навестува задушување на протестите.
- Очекуваме полицијата да изврши разбивање на мирните демонстранти, изјави опозицискиот лидер Виталиј Кличко.
- Ако при растурањето на протестите се пролее крв, таа крв ќе биде врз рацете на човекот, што ги наредил... Јанукович, рече тој.
Напнатоста се зголеми и откако двоен кордон од полицајци со заштитни шлемови и штитови беше распореден на улицата до зградата на општината, окупирана од демонстрантите и претворена во импровизиран команден пункт.
Во текот на ноќта електричната енергија на зградата беше запрена и демонстрантите започнаа да си одат, очекувајќи полицијата да може да упадне во местото. Подоцна осветлувањето проработи и некои од демонстрантите се вратија кон окупација на зградата.
Се очекува Јанукович денеска да се сретне со високиот претставник на ЕУ за надворешна политика и безбедност Кетрин Ештон и со тројца поранешни украински претседатели, кои планираат преговори.