Киев, 22 јануари 2014 (МИА) – Украинските сили за безбедност утрото разбија барикади поставени од демонстранти во Киев, по што почнаа нови судири, а активистите тврдат дека е убиено едно лице.
Полицијата во утринските часови полокално време почна да растура барикади и да апси демонстранти поради што избија нови судири. Демонстрантите фрлаат со Молотови коктели врз полицијата која одговара со солзавец и шок-бомби.
Досега се приведени неколку лица, јавуваат локални медиуми.
Медицинската служба на украинското протестно движење во Киев соопшти дека еден демонстрант врз кого пукала полицијата од снајперска пушка бил убиен. Таа служба соопшти дека уште едно лица загинало откако паднал од врв на свечен влез на фудбалскиот стадион на Динамо Киев.
Премиерот на Украина Микола Азаров синоќа изјави дека украинските власти нема да имаат друг избор освен да употребат сила доколку „провокаторите“ не престанат да поттикнуваат судири.
– Ако провокаторите не престанат, властите нема да имаат друг избор освен да употребат сила согласно законите и да обезбедат сигурност на нашиот народ, изјави тој за информативниот канал Вести 24, имајќи ги предвид контроверзните закони за забрана на протести кои вчера стапија на сила. Со тој сет закони забрането е неодобрено поставување бини и шатори, што беше карактеристика на бранот нови протести. На оние што обезбедуваат опрема за митинзи им се заканува затворска казна. Предвидени се и затворски казни до 15 години за „масовно кршење“ на јавниот ред.