Москва, 18 март 2014 (МИА) - За да биде разбрана одлуката на жителите на Крим да се присоединат кон Руската Федерација, треба да се познава историјата на регионот, изјави рускиот претседател Владимир Путин пред пратениците на Државната дума, членови на Советот на федерацијата и раководители на региони.
Во обраќање по повод приемот на Република Крим во составот на федерацијата, тој појасни „што значи Русија за Крим и Крим за Русија“.
Според него, во регионот бил древниот град Херсон, каде православието го примил Светиот кнез Владимир, таму се гробовите на руските војници, со чие јунаштво во 1783 година бил преземен полуостровот, а Севастопољ е град херој и база на руската Црноморска флота.
Путин наброи неколку географски објекти на Крим, кои ги оцени како „симболи на воинска слава и невидена доблест“ и како „свети места за Русија“.
Рускиот претседател во исто време истакна дека полуостровот претставува „уникатен сплет на култури и традиции на различни народи“ - Руси, Украинци, кримски татари и други, кои „рамо до рамо се труделе да ја зачуваат својата самобитност, традиции, јазик и религија“.