Љубљана, 14 април 2014 (МИА) - Словенечката премиерка Аленка Братушек од денеска го презема и ресорот здравство бидејќи синоќа истече рокот до кога мораше на Парламентот да му соопшти кој ќе раководи со Министерството за здравство по оставката на министерката Аленка Троп Сказа.
Братушек имаше можност да предложи еден кандидат за министер за здравство, но таа не се одлучи пред да ја провери довербата на Владата во Парламентот и својот авторитет на конгресот на партијата Позитивна Словенија, на кој главен противкандидат би требало да биде поранешниот претседател на партијата и градоначалник на Љубљана Зоран Јанковиќ.
Кандидат за министер за здравство беше државната секретарка во Министерството Нина Пирнат.