Гетеборг, 15 април 2014 (МИА) - Позитивните ставови меѓу граѓаните на Шведска кон зачленување НАТО се во пораст, јави дописникот на МИА од Гетеборг.
Според резултатите од најновото испитување на јавното мислење спроведено од страна на институтот „СОМ“, кои наскоро ќе бидат презентирани во јавноста, 29 проценти од испитаниците сметаат дека е добар предлогот неутрална Шведска да поднесе барање за прием во членството на НАТО.
Лани во слично истражување за поддршка за членство во Алијансата се изјасниле 17 отсто од испитаниците.
Шведските аналитичари сепак предупредуваат дека треба да се има предвид периодот во кој е спроведено истражувањето, односно од октомври до декември лани, значи пред периодот на заострувањето на кризата во Украина, која се чини има спротивен ефект и моментно го засилува отпорот против НАТО во Шведска.
Анкета што ја направи „Свенска дагбладет“ во март годинава покажува дека 50 отсто од анкетираните биле против членството во НАТО, што претставува зголемување од 10 остсто на отпорот против пристапувањето во Алијансата во споредба со истражувањето што тој весник го спроведе пред една година.