Киев, 16 април 2014 (МИА) - Украинската војска покрена „антитерористичка“ акција против проруските „народни милиции“ на југоистокот на земјата, каде во борбите за воениот аеродром кај Краматорск загинаа четворица припадници на милициите, а повредени се уште четворица.
Активисти од „народната милиција“ соопштија дека се подготвени да ги бранат влезовите во Краматорск кој го надлетуваат украински воени авиони и хеликоптери, додека во блискиот Славјанск наводно влегла украинска војска на тенкови, но таму се уште нема знаци на борба.
Поголем дел од информациите во медиумите се базираат на изјави на неименувани очевидци кои споменуваат за уште жртви, а според нивните тврдења еден авион на украинската армија е соборен над Краматорск, додека во нападот врз аеродромот учествувале платеници на американскиот „Блеквотер“.
В.д. претседателот на Украина Олександр Турчинов потврди дека е покрената специјална воена операција на југоистокот со цел да ги заштити граѓаните, но армијата не изнела податоци за евентуалните загуби.
Украинскиот вицепремиер Виталиј Јарем изјави дека во Славјанск и Краматорск се забележани припадници на 45-та воздушно-десантна дивизија на руската армија, кои ја зајакнале „народната милиција“ во овие градови.
Димитриј Песков, портпарол на рускиот претседател Владимир Путин, меѓутоа, ги отфрли таквите тврдења и изјави дека на истокот на Украина нема руски воени сили, истакнувајќи дека се апсурдни наводите за присуство на руска војска во земјата.