Возењето велосипед ќе спасува 9.000 животи годишно

Рим, 16 април 2014 (МИА) - Возењето велосипед може да отвори над 76.000 работни места и да спаси повеќе од 9.000 човечки животи годишно, покажува заедничко истражување на Комисијата за Европа на ОН и на регионалното претставништво на Светската здравствена организација за Европа објавено денеска во Рим. 

Бидејќи Комисијата ги опфаќа и САД и Канада, а Израел и сите поранешни советски републики во Азија се третираат како дела од европскиот регион на СЗО, податоците за овие земји исто така се вклучени во истражувањето, кое ги опфаќа само главните градови.

Загадувањето на воздухот поради интензивниот сообраќај одзема 500.000 животи, додека други 90.000 лица гинат годишно во сообраќајни несреќи. Вревата од градскиот сообраќај има штетни последици за околу 70 милиони жители на главните градови, покажуваат податоците на ОН.

Според проучувањето, поинтензивното возење на велисопед во регионот ќе има здравствен и економски ефект. Засега тоа најмногу се применува во главните градови на Холандија и Данска, а потоа следуваат Германија, Швајцарија и Словенија.