Вашингтон, 25 април 2014 (МИА) - Американскиот државен секретар Џон Кери ја обвини Русија дека не ги исполнува преземените обврски согласно Женевскиот договор за смирување на кризата во Украина.
Кери истакна дека ако Москва не преземе итни мерки за намалување на тензиите, тоа ќе претставува сериозна и скапа грешка.
Според него, во тој случај Вашингтон нема да има друг избор, освен да воведе дополнителни санкции. Тој нагласи дека времето во кое Москва може да го промени својот пристап истекува и дека САД се подготвуваат да дејствуваат.
- Можноста за промена на курсот се затвора, предупреди Кери во изјава пред новинарите во американскиот Стејт департментот.
Според Кери, Русија користи пропаганда да ги скрие намерите во Источна Украина и се обидува да го дестабилизира регионот и да ги поткопа изборите во Украина предвидени за идниот месец.
Кери истакна дека американското разузнавање располага со податоци дека руските специјални служби „играат улога во дестабилизирањето на ситуацијата“ во Украина. Според него, како што јави ИТАР-ТАСС, некои од агентите биле застрелани во Славјанск.
Американскиот државен секретар, исто така, нагласи дека украинските власти од самиот почеток го исполнуваат договорот постигнат во Женева.